DSLR Camera hman dan tlangpui

Tunlai khawvel ṭhang chho zelah, technology pawh a ṭhang duang hle mai a, Mizo te pawhin Electronic Gadget changkang tak tak kan hum fur tawh hlawm, chung zingah chuan DSLR (Digital Single Lens Reflector) Camera hi hmel hriat lo leh a hming tal hre lo chu kan awm tawh mangin a rin awm loh. Amaherawh, chu mitam tak Camera nei, mahse hman ngaihna hre lo leh laklawh thu hlaa mi thla han laksak lawk a ṭul chang pawh a kan bo lutuk loh nan a hman dan tlanglawn tlem a zawng kan han tarlang dawn a ni.

A hmasa berah chuan thil ṭhenkhat kan hriat ngei ngei turte han tarlang ila.

Camera hian thalak fiah leh hmuhnuam tak kan neih theih nan êng (light) lo lut kan thunun theih dan tur kawng thum a nei a chûng te chu Aperture (f-stop), Shutter Speed, leh ISO te hi an ni. Heng thil pathum te hi a in khuangrual tawk a kan dah thiam chuan thalak quality ṭha tak kan nei a ni mai.

Aperture : F-stop ti pawn sawi ṭhin a ni. Shutter speed ang thoin Camera a êng lut lo control tu pawimawh tak a ni. Camera lens hi chiang taka kan en a,  ‘Zoom ring’ kan han herh kual vel chuan thil kual kan hreh rual a in hawng zim leh zau thei kan hmu ang, kha thil kha kawngkhar ang deuh hi a ni a, a in hawn zau poh leh camera a êng lo lut kha a ṭhahnem dawn tihna a ni a, chutiang bawkin a in hawn zim leh eng a lut tlem dawn tihna a ni. Aperture a san poh leh thalak a thim a, a hniam poh leh a eng thung.

Entirnan : F6.0 a aperture I dah ai chuan F9.0 a I dah khan i thalak a thim zawk ang

Shutter Speed : Camera-a êng lo lut tura shutter in hawn leh inkhar hunchhung sawina a ni. Camera hmalam a lens hi kan phawi chuan darthlalang (heihi a shutter kan tih tak chu a ni) kan hmu anga chumi hnung lehah chuan camera sensor a lo awm ang.  Thla la tura a shutter release button kan hmeh chiah khan a (shutter speed kan dah dan a zirin) camera sensor hma chiah a darthalang (Shutter) lo awm kha a in hawng reiin a in hawng rei dawn lo tih a ni. A shutter a in hawn rei poh leh camera-ah êng a lut rei dawn tih na a ni a, eng a luh rei chuan kan thalak pawh a eng telh telh dawn tihna a ni, Shutter speed a san poh leh shutter in hawn hunchhung a rei lo a, thalak pawh a thim tial tial dawn tihna a ni. Shutter speed a sân poh leh thalak a thim a, a muan poh leh thalak a eng.

Entirnan : 1/60 shutter speed-a i dah ai chuan 1/100 a i dah khan i thalak a thim zawk ang.

ISO : Hei pawh a sang poh leh thalak a eng a, a hniam poh leh thalak a thim.

Entirnan : ISO 200 a i dah ai chuan 800 a i dah khan i thalak a êng zawk dawn tihna.

( Khing a chunga kan sawi te khi a number (value) a san leh hniam khian thalak ên leh thimah ringawt nghawng a nei lo a, amaherawh chu tun ṭumah chuan chung zawng zawng chu kan sawi vek seng loah ngai ila)

Camera part pawimawh zual te:

1. Lens: Camera-ah chuan a part pawimawh ber a tih theih awm e, Lens hi chi hrang hrang a awm a, kan thlalak ṭhin a zir leh mimal duh dan a zirin lens hi thlak kual zûng zung theih a ni. Tun ṭumah hian kan rawn ziah tum ber chu engtin nge thlak fiah felfai leh ên dan (exposure) diktak a thla kan lak theih ang tih a nih avangin  a tlangpui zawr zawr chauh kan sawi dawn a ni.

2. Focusing Ring : Camera lens kan zoom leh manual-a kan focus na hi.

 

3.Viewfinder : Thla kan lak dawn a kan va bih na lai tak hi a ni a, viewfinder-ah hian thalak a kan khung tur chin (framing) hriat nan te, a camera a zirin kan settings-te leh a focus nalai tak (focus point) LCD a zuk en kher ngai loin awlsam takin kan hmu thei a ni.

4. Shutter release button : He thil hi DSLR la hmelhriat lo ten kan zawn buai chuk chuk ṭhin a ni. Thla latura Camera thu kan pekna a ni.

4. Mode dial : Camera model azirin a danglam thei, tun ṭumah hi chuan a tlanglawn ber tura kan ngaih hmangin kan rawn sawifiah dawn a. Kan sawitawh angin a vai vai a sawi loin a pawimawh zual M, AV, TV, P, AUTO leh FLASH OFF te chauh hi kan rawn sawi dawn a ni.

M - Manual mode tihna a ni a, he mode hian a hmangtu hnenah zalenna famkim a pe a, settings zawng zawng a hmangtu turin a dah ang angin a awm tawp mai a ni.

AV - Aperture Priority Mode. He mode-ah hi chuan kan aperture kha kan dah pawimawh ber tihna a ni a, kan duh danin aperture (f stop) leh ISO-ah kan dah anga, Shutter speed chu camera-in a tâwk turin a lo dah mai dawn a ni.

TV - Shutter Priority Mode. Nikon Camera ah chuan ‘S’ tiha dah a ni. Hetah ve thung hi chuan Shutter speed leh ISO kan duh dan in kan dah anga, Camera in a in mil tawk turin aperture a lo set mai dawn a ni.

P- Programmee Exposure Mode. Hetah ve thung hi chuan kan thla va lak tur tak kan va focus khan camera-in exposure ṭha thei tur ang berin a lo set vek anga, amaherawh chu kan duh dan a nih loh chuan kan tidanglam (override) leh thei tho. ISO erawh kan kutah a awm thung.

AUTO - A hming hian a sawi fiah viau awm e, dial mode-a a hring bial (Auto Mode) zawna  kan dah hian camera in kan tihdanglam theih lohin a settings zawng zawng leh flash hman a ngaih leh ngaih loh thlengin kan thalak tur a zirin a lo siam fel vek mai ṭhin a ni.

FLASH OFF - Auto mode nen hian danglamna pakhat chiah a nei a, chu chu flash a hmang ve lo. Eng anga thimah pawh flash hmang si lova thalak quality ṭha thei ang ber pekchhuah tumin camera-in settings alo siam fel ṭhin. Hmanhmawh thil thuah chuan mode ṭangkai tak a ni.

Auto leh Semi-Auto Mode hrang hrang kan sawi aṭang khian thalak ṭha tak tak awlsam takin a lak zûng zung theih a, amaherawh chu kan duhthusam thlap a ni lo ve thei, chuvang chuan Manual mode hman dan hi tlema sawi zau leh tum ta ila.

Manual mode-ah chuan a hmasa lama kan sawi tak Aperture, Shutter speed leh ISO te khi an nihna leh an hnathawh diktak kan hriat chian phawt chuan buaina tur a awm lo.

I. A hmasa berah chuan i camera kha Manual mode-ah han dah phawt la

II. I lens kha en la AF/MF tih a awm chuan AF(Auto focus) ah khan dah la, a awm loh chuan a focusing ring hmang khan i thla laksak tur kha i focus phawt ang

III. I camera LCD-ah khan settings a lo awm ṭeuh anga ( LCD a thim vek chuan ‘DISP’ tih kha i hmet ang) tuna tan chuan Aperture(f-stop) leh ISO ah chiah kan in sawrbing hrih a nga , Shutter Speed kha chu a awm dan ang ang khan dah phawt la.

IV. I camera khan hmun eng lam deuh kha han tin la engemaw focus tur bik entirnan thingkung emaw building emaw thil chesawn lo tur zawng la.

V. ISO kha 100 ah i dah bawk ang

VI. I focus fel vek hnuah   shutter button kha a zahve vel kha hmet tlum zeuh la chuan i LCD a Exposure Compensation level (A eng a in rinkual hi) kha i en ang, number hnuaiah thil phe zeuh zeuh i hmu thei ang, (-) / (+) lamah zawk zawk pawh khan awm se a pawi lo, chuan thla kha han la tawp mai la.

VII. I thalak kha han en leh la, a thim lutuk chuan a underexposed tihna a ni a a ên lutuk chuan a overexposed tihna a ni.

VIII. Engtin nge exposure dik takin kan lak theih ang? Awle, Step IV-VI na a i tih ang chiah khian i ti leh ang, chuan Exposure Compensation level bawk kha i en leh anga, number hnuaia thil phe zeuh zeuh tê kha a lai tak ‘0’ hnuaih ah khan a awm tur a ni. Chumi tur chuan command dial kha i shutter speed thlak turin i herh kual vel dawn a ni. A hma a i thalak kha a thim lutuk chuan sana vir loh zawngin (counter clockwise) ‘0’ hnuaia a awm hma chu i herh char char ang, chutiang bawk in i thalak a ên lutuk chuan sana vir zawng (clockwise) i herh ve thung ang.

PS : Shutter speed a muan lutuk chuan thalak a blur hma êm êm a, chuvang chuan ISO leh Aperture hmanga ṭan kawp thiam a pawimawh.